ఆదిలాబాద్ రిమ్స్‌లో అగ్నిప్రమాదం.. ఏసీ పేలి పసికందు మృతి
దట్టమైన పొగలతో భయాందోళన.. పలువురు చిన్నారులకు అస్వస్థత
ఆదిలాబాద్: ఆదిలాబాద్ జిల్లా కేంద్రంలోని రాజీవ్ గాంధీ ఇన్‌స్టిట్యూట్ ఆఫ్ మెడికల్ సైన్సెస్ (RIMS) ఆసుపత్రిలో సోమవారం అర్ధరాత్రి దాటిన తర్వాత తీవ్ర విషాదం చోటుచేసుకుంది. ఆసుపత్రిలోని నవజాత శిశువుల ప్రత్యేక సంరక్షణ విభాగం (SNCU)లో షార్ట్‌సర్క్యూట్ కారణంగా ఏసీ యూనిట్ పేలడంతో మంటలు చెలరేగాయి. దీంతో వార్డులో ఒక్కసారిగా దట్టమైన పొగలు కమ్ముకున్నాయి.
ప్రమాదం సమయంలో వార్డులో పలువురు నవజాత శిశువులు చికిత్స పొందుతున్నారు. పొగలు వ్యాపించడంతో తల్లిదండ్రులు, ఆసుపత్రి సిబ్బంది అప్రమత్తమై చిన్నారులను బయటకు తరలించారు. కొందరు చిన్నారులు అస్వస్థతకు గురికావడంతో మెరుగైన చికిత్స కోసం సమీపంలోని ప్రైవేట్ ఆసుపత్రులకు తరలించారు.ఈ ఘటనలో ఐదు రోజుల వయసున్న ఓ పసికందు మృతి చెందినట్లు సమాచారం.
ప్రమాదం సమాచారం అందుకున్న వెంటనే అగ్నిమాపక సిబ్బంది రిమ్స్‌కు చేరుకుని మంటలను అదుపులోకి తెచ్చారు. ఆసుపత్రి సిబ్బంది విద్యుత్ సరఫరాను నిలిపివేసి సహాయక చర్యలు చేపట్టారు.
ఘటన విషయం తెలుసుకున్న జిల్లా కలెక్టర్ రాజర్షి షా, జిల్లా ఎస్పీ అఖిల్ మహాజన్ రిమ్స్ ఆసుపత్రికి చేరుకుని పరిస్థితిని సమీక్షించారు. మిగిలిన చిన్నారులకు మెరుగైన వైద్యం అందించడంతో పాటు ప్రమాదానికి గల కారణాలను పరిశీలించాలని అధికారులను ఆదేశించారు. ఘటనపై పోలీసులు దర్యాప్తు చేపట్టారు.
ప్రమాదానికి షార్ట్‌సర్క్యూట్ కారణమైందా? ఆసుపత్రిలో భద్రతా ప్రమాణాలు ఎలా ఉన్నాయి? అనే అంశాలపై అధికారులు విచారణ కొనసాగిస్తున్నారు.
About the Author
Today's Best Deals
Affiliate Disclosure: Some links on this page are affiliate links. Zindagi9News may earn a commission from qualifying purchases.
