ఇండియన్ఆయిల్లో 470 ఉద్యోగాలు.. ఇంజినీరింగ్ నుంచి లా వరకు భారీగా పోస్టులు
న్యూఢిల్లీ: ఇండియన్ఆయిల్ కార్పొరేషన్ లిమిటెడ్ (IOCL) ఎగ్జిక్యూటివ్ పోస్టుల భర్తీకి భారీ నియామక ప్రకటన విడుదల చేసింది. కంప్యూటర్ బేస్డ్ టెస్ట్ (CBT)–2026 ద్వారా మొత్తం 470 ఖాళీలను భర్తీ చేయనుంది. 2026 ఆగస్టు 14న విడుదలైన నోటిఫికేషన్ ప్రకారం గ్రాడ్యుయేట్ ఇంజినీర్లు, MBA, LLB, M.Sc. కెమిస్ట్రీ, డిప్లొమా అభ్యర్థులు ఆయా పోస్టులకు దరఖాస్తు చేసుకోవచ్చు.
పోస్టుల వివరాలు
గ్రేడ్–Aలో సివిల్ 62, కెమికల్ 16, ఎలక్ట్రికల్ 75, ఎలక్ట్రానిక్స్ అండ్ కమ్యూనికేషన్ 32, మెకానికల్ 118, ఇన్స్ట్రుమెంటేషన్ 35, కంప్యూటర్ సైన్స్ అండ్ ఐటీ 22, లా 10, మార్కెటింగ్ 41 పోస్టులు ఉన్నాయి.
గ్రేడ్–A0లో క్వాలిటీ కంట్రోల్ (కెమిస్ట్రీ) 9 పోస్టులు, గ్రేడ్–E0లో ఎలక్ట్రికల్ 14, మెకానికల్ 21, సేఫ్టీ 15 పోస్టులు ఉన్నాయి. ఈ పోస్టులన్నింటినీ కలిపి మొత్తం 470 ఖాళీలు ఉన్నాయి. సంస్థ అవసరాల ఆధారంగా ఖాళీల సంఖ్య పెరగవచ్చు లేదా తగ్గవచ్చని IOCL తెలిపింది.
విద్యార్హతలు
గ్రేడ్–A ఇంజినీరింగ్ పోస్టులకు సంబంధిత విభాగంలో B.E./B.Tech లేదా సమానమైన పూర్తి స్థాయి రెగ్యులర్ డిగ్రీ ఉండాలి. జనరల్, EWS, OBC(NCL) అభ్యర్థులకు కనీసం 65 శాతం, SC/ST/PwBD అభ్యర్థులకు 55 శాతం మార్కులు అవసరం. మార్కెటింగ్ పోస్టుకు MBA/PG Diploma in Business Administrationలో Marketing specialization, లా పోస్టుకు Graduationతో పాటు LLB లేదా 5 సంవత్సరాల Integrated LLB అర్హతగా నిర్ణయించారు.
క్వాలిటీ కంట్రోల్ పోస్టుకు సంబంధిత కెమిస్ట్రీ విభాగంలో M.Sc. అర్హత అవసరం. డిప్లొమా ఇంజినీర్ పోస్టులకు సంబంధిత విభాగంలో మూడేళ్ల డిప్లొమా ఉండాలి.
వయోపరిమితి
2026 జూలై 1 నాటికి గ్రాడ్యుయేట్ ఇంజినీర్, డిప్లొమా ఇంజినీర్ పోస్టులకు గరిష్ఠ వయస్సు 26 ఏళ్లు. మార్కెటింగ్ అధికారికి 28, లా అధికారికి 30, అసిస్టెంట్ క్వాలిటీ కంట్రోల్ అధికారికి 30 ఏళ్లుగా నిర్ణయించారు. రిజర్వేషన్ వర్గాలకు నిబంధనల ప్రకారం వయో సడలింపు ఉంటుంది.
అనుభవం తప్పనిసరి
లా ఆఫీసర్, అసిస్టెంట్ క్వాలిటీ కంట్రోల్ ఆఫీసర్ పోస్టులకు కనీసం రెండేళ్ల పోస్ట్-క్వాలిఫికేషన్ అనుభవం అవసరం. లా ఆఫీసర్ పోస్టుకు కోర్టులు, లా ఫర్మ్స్, ప్రభుత్వ/ప్రైవేటు సంస్థల్లో సంబంధిత లీగల్ అనుభవం పరిగణనలోకి తీసుకుంటారు. క్వాలిటీ కంట్రోల్ పోస్టుకు పెట్రోలియం, పెట్రోకెమికల్, పాలిమర్, ఫెర్టిలైజర్ ల్యాబొరేటరీల్లో Testing/R&D/Quality Control అనుభవం లేదా నిర్దిష్ట NABL గుర్తింపు పొందిన ల్యాబ్లో అనుభవం అవసరం.
జీతం ఎంతంటే..
ఎంపికైన వారికి ఆకర్షణీయమైన వేతనంతో పాటు ఇతర అలవెన్సులు, ప్రయోజనాలు అందనున్నాయి. గ్రేడ్–Aలో ప్రారంభ ప్రాథమిక వేతనం నెలకు రూ.50,000, పే స్కేల్ రూ.50,000–1,60,000 కాగా సుమారు వార్షిక CTC రూ.18.4 లక్షలు. గ్రేడ్–A0లో ప్రారంభ ప్రాథమిక వేతనం రూ.40,000, సుమారు వార్షిక CTC రూ.14.8 లక్షలు. గ్రేడ్–E0లో ప్రారంభ ప్రాథమిక వేతనం రూ.30,000, సుమారు వార్షిక CTC రూ.11.1 లక్షలు. DA, HRA/సబ్సిడైజ్డ్ హౌసింగ్ తదితర ప్రయోజనాలు కూడా ఉంటాయి.
ఎంపిక విధానం
అభ్యర్థుల ఎంపికలో CBT, Group Discussion (GD), Group Task (GT), Personal Interview (PI) ఉంటాయి. CBTలో మొత్తం 100 ఆబ్జెక్టివ్ ప్రశ్నలు ఉంటాయి. General Aptitude విభాగంలో Quantitative Aptitude 20, Logical Reasoning 15, English Verbal Ability 15 ప్రశ్నలు, Domain Knowledgeలో 50 ప్రశ్నలు ఉంటాయి. ప్రతి తప్పు సమాధానానికి 0.25 మార్కు నెగెటివ్ మార్కింగ్ ఉంటుంది.
మెరిట్లో CBTకి 85 శాతం, GD/GTకి 5 శాతం, Personal Interviewకు 10 శాతం వెయిటేజీ ఉంటుంది.
ముఖ్యమైన తేదీలు
ఆన్లైన్ దరఖాస్తుల స్వీకరణ ఆగస్టు 14న ప్రారంభమై సెప్టెంబర్ 3, 2026 సాయంత్రం 5 గంటల వరకు కొనసాగుతుంది. అడ్మిట్ కార్డులు సెప్టెంబర్ 15న, CBT సెప్టెంబర్ 24న నిర్వహించనున్నట్లు నోటిఫికేషన్లో పేర్కొన్నారు. తేదీలు మారే అవకాశం ఉందని IOCL తెలిపింది.
దరఖాస్తు ఫీజు
SC, ST, PwBD అభ్యర్థులకు దరఖాస్తు ఫీజు నుంచి మినహాయింపు ఉంది. మిగిలిన అభ్యర్థులు రూ.1,000 + GST నాన్-రిఫండబుల్ అప్లికేషన్ ఫీజు చెల్లించాలి.
ఎలా దరఖాస్తు చేయాలి?
అభ్యర్థులు ఆన్లైన్లో మాత్రమే దరఖాస్తు చేసుకోవాలి. హార్డ్కాపీ/మాన్యువల్ దరఖాస్తులను స్వీకరించరు. IOCL అధికారిక వెబ్సైట్లోని Latest Job Opening విభాగం ద్వారా అప్లికేషన్ చేసుకోవాలి.
ఆన్లైన్ దరఖాస్తు: https://iocl.com/latest-job-opening
పూర్తి వివరాలకు..
గమనిక: ఎంపికైన అభ్యర్థులు సంస్థ అవసరాల మేరకు దేశంలోని ఏ ప్రాంతంలోనైనా పనిచేయాల్సి రావచ్చు. అలాగే ఎంపికైన వారు కనీసం మూడు సంవత్సరాలు సంస్థలో సేవ చేయడానికి బాండ్ ఇవ్వాల్సి ఉంటుంది. గ్రేడ్–Aకు జనరల్ కేటగిరీలో రూ.3 లక్షలు, ఇతర రిజర్వేషన్ కేటగిరీలకు రూ.50,000; గ్రేడ్–A0/E0కు వరుసగా రూ.2 లక్షలు, రూ.35,000 బాండ్ మొత్తం ఉంటుంది.
About the Author
