హైదరాబాద్: తెలంగాణ రాష్ట్ర ముఖ్యమంత్రి ఏ. రేవంత్ రెడ్డి కొత్తగా ఉద్యోగాల్లో చేరుతున్న అభ్యర్థులను ఉద్దేశించి మాట్లాడుతూ, “దశాబ్ద కాలం అవకాశాల కోసం ఎదురుచూసిన మీ కల నెరవేరుతోంది. ఇది జీవితాంతం గుర్తుండిపోయే సందర్భం. తెలంగాణను అద్భుత రాష్ట్రంగా తీర్చిదిద్దడంలో మీరూ భాగస్వాములవ్వాలి” అంటూ వారికి అభినందనలు తెలిపారు.
922 ఉద్యోగ నియామక పత్రాల పంపిణీ
పంచాయతీ రాజ్ శాఖ, గ్రామీణాభివృద్ధి, మున్సిపల్ శాఖల్లో కారుణ్య నియామకాలు మరియు ఇతర విభాగాల నియామకాల్లో భాగంగా 922 మందికి నియామక పత్రాలు అందజేయడం జరిగింది. ఈ కార్యక్రమాన్ని “ప్రజా ప్రభుత్వం – కొలువుల పండుగ” పేరుతో ముఖ్యమంత్రి ప్రారంభించారు.
ప్రభుత్వ ఉద్యోగం – ప్రతి కుటుంబానికి వారసత్వ హక్కు
ముఖ్యమంత్రి రేవంత్ రెడ్డి మాట్లాడుతూ, “గత ప్రభుత్వాలు 2015 నుంచి కారుణ్య నియామకాలు చేపట్టకపోవడంతో యువత తమ విలువైన సమయాన్ని కోల్పోయారు. తెలంగాణ ఏర్పడితే ఉద్యోగ ఖాళీలన్నింటినీ భర్తీ చేస్తారని భావించినా, నిర్లక్ష్య వైఖరి కొనసాగింది. అయితే ప్రజా ప్రభుత్వం అధికారం చేపట్టిన తొలి ఏడాదిలోనే 57,924 ప్రభుత్వ ఉద్యోగాలను భర్తీ చేయడం విశేషం” అని స్పష్టం చేశారు.
తెలంగాణ – దేశానికి మోడల్ రాష్ట్రం
“స్వాతంత్ర్యం వచ్చినప్పటి నుంచి ఏ రాష్ట్రంలోనూ తొలి ఏడాదిలో ఇన్ని ఉద్యోగాలను భర్తీ చేసిన ప్రభుత్వం లేదు. తెలంగాణ ఇప్పుడు దేశానికి ఉద్యోగ నియామకాల్లో మోడల్ రాష్ట్రంగా నిలుస్తోంది” అని ముఖ్యమంత్రి వివరించారు.
ఈ కార్యక్రమంలో మంత్రి ధనసరి అనసూయ (సీతక్క), ప్రభుత్వ సలహాదారులు హర్కర వేణుగోపాల్ రావు, ఎస్. వేణుగోపాలా చారి, జీహెచ్ఎంసీ మేయర్ గద్వాల విజయలక్ష్మి, ప్రభుత్వ ప్రధాన కార్యదర్శి శాంతి కుమారి, తదితర ఉన్నతాధికారులు పాల్గొన్నారు.
—
Zindagi9News
తెలంగాణ ప్రభుత్వ ఉద్యోగ నియామకాలపై మీ అభిప్రాయాలు కామెంట్ చేయండి!
About the Author
