జమ్మికుంటలో డ్రగ్స్పై అవగాహన సదస్సు
జమ్మికుంట పట్టణంలోని స్థానిక ప్రభుత్వ జిల్లా పరిషత్ బాలుర ఉన్నత పాఠశాలలో గురువారం రోజున డ్రగ్స్పై అవగాహన సదస్సు నిర్వహించారు. ఈ కార్యక్రమాన్ని జమ్మికుంట సీఐ వరగంటి రవి ఆధ్వర్యంలో నిర్వహించగా, బాలికల మరియు కోరపల్లి ప్రభుత్వ పాఠశాల అధ్యాపకుల బృందం సహకరించారు.
ఈ సందర్భంగా సీఐ వరగంటి రవి మాట్లాడుతూ,
“నేటి విద్యార్థులు రేపటి భావి భారత పౌరులు. విద్యార్థి దశలోనే పిల్లలను మంచి మార్గంలో నడిపించడం మన బాధ్యత. సమాజంలో జరుగుతున్న అనైతిక కార్యకలాపాలపై అవగాహన కల్పించి, యువతను డ్రగ్స్, గంజాయి వంటి మాదకద్రవ్యాలకు దూరంగా ఉంచడం అవసరం. పట్టణాల్లోనే కాకుండా, ఇప్పుడు పల్లెల్లో కూడా డ్రగ్స్ వ్యాపించాయి. ముఖ్యంగా జమ్మికుంటలో రైల్వే స్టేషన్ ఉండటంతో ఉత్తరాది రాష్ట్రాల నుంచి గంజాయి తరలింపు పెరిగింది. ఇది యువతను చెడు మార్గంలో నడిపిస్తోంది” అని చెప్పారు.
డ్రగ్స్ ప్రభావం గురించి ఆయన హెచ్చరించారు:
- “డ్రగ్స్, గంజాయికి అలవాటు పడిన యువకులు ఎంతటి నేరానికైనా వెనుకాడరు.”
- “ఆ మత్తులో వారు ఏం చేస్తున్నారో కూడా వారికి అర్థం కావడం లేదు.”
- “ఈ అలవాటు అనేక రోగాలకు దారి తీస్తుంది, చివరికి ప్రాణాలకే ముప్పు తెచ్చిపెడుతుంది.”
కాబట్టి యువత, విద్యార్థులు ఇలాంటి చెడు వ్యసనాలకు దూరంగా ఉండాలని, ఎల్లప్పుడూ మంచి మార్గంలో నడవాలని సూచించారు.
ఈ కార్యక్రమంలో మండల విద్యాధికారి ఎం. హేమలత, బాలికల పాఠశాల హెచ్ఎం సుధాకర్, బాలుర పాఠశాల అధ్యాపక సిబ్బంది పాల్గొన్నారు.
About the Author
