జ్యోతిష్యం కోసం పేరు మార్చుకోవచ్చు.. కర్ణాటక హైకోర్టు కీలక తీర్పు
పేరు ద్వారా గుర్తింపు పొందడం సివిల్ రైట్ అని స్పష్టం.. స్కూల్ రికార్డుల్లోనూ పేరు మార్చాలని ఆదేశం
బెంగళూరు: జ్యోతిష్యం, న్యూమరాలజీ వంటి నమ్మకాల ఆధారంగా పేరు మార్చుకోవాలనుకునే వ్యక్తులకు కర్ణాటక హైకోర్టు కీలక తీర్పు ఇచ్చింది. ఒక వ్యక్తిని అతని లేదా ఆమె పేరుతో గుర్తించడం సివిల్ రైట్ అని కోర్టు స్పష్టం చేసింది. పేరు మార్చుకోవడానికి సివిల్ కోర్టును ఆశ్రయించవచ్చని పేర్కొంది. జస్టిస్ హంచాతే సంజీవ్‌కుమార్ ఈ మేరకు తీర్పు వెలువరించారు.
ఈ కేసులో ఓ మైనర్ బాలిక పేరును జ్యోతిష్యం, న్యూమరాలజీ కారణాలతో మార్చాలని ఆమె తండ్రి కోరారు. పుట్టిన సమయంలో బాలికకు ‘లక్ష్మి ఎన్.’ అనే పేరు పెట్టగా, అనంతరం ‘వీణ ఎన్.’గా పేరు మార్చాలని కుటుంబం నిర్ణయించింది. ఇందుకోసం సివిల్ కోర్టును ఆశ్రయించగా, ట్రయల్ కోర్టు అభ్యర్థనను తిరస్కరించింది. దీంతో బాలిక తరఫున హైకోర్టులో అప్పీల్ దాఖలైంది.
కేసును విచారించిన హైకోర్టు ట్రయల్ కోర్టు నిర్ణయాన్ని పక్కనపెట్టింది. వ్యక్తిగత గుర్తింపులో పేరుకు ఉన్న ప్రాధాన్యతను ప్రస్తావిస్తూ, పేరు మార్పు లేదా సవరణకు సంబంధించి సివిల్ కోర్టును ఆశ్రయించే హక్కు ఉందని పేర్కొంది. జ్యోతిష్యం, సంఖ్యాశాస్త్రం వంటి కారణాలను ప్రస్తావిస్తూ పేరు మార్చుకోవాలని కోరినందుకు మాత్రమే అభ్యర్థనను తిరస్కరించడం సమంజసం కాదని తీర్పులో పేర్కొంది.
దీంతో బాలిక పేరును ‘లక్ష్మి ఎన్.’ నుంచి ‘వీణ ఎన్.’గా మార్చేందుకు హైకోర్టు అనుమతించింది. విద్యాసంస్థల రికార్డుల్లోనూ కొత్త పేరును నమోదు చేయాలని సంబంధిత అధికారులను ఆదేశించింది.
About the Author
Today's Best Deals
Affiliate Disclosure: Some links on this page are affiliate links. Zindagi9News may earn a commission from qualifying purchases.
