జమ్మికుంట బీసీ హాస్టల్ వార్డెన్‌పై చర్యలు తీసుకోవాలి: PDSU
కరీంనగర్, సెప్టెంబర్ 21(Zindagi9news): జమ్మికుంట పట్టణంలోని బీసీ హాస్టల్ నిర్వహణపై విచారణ జరిపి తక్షణ చర్యలు తీసుకోవాలని ప్రగతిశీల ప్రజాస్వామ్య విద్యార్థి సంఘం (PDSU) కరీంనగర్ జిల్లా కమిటీ డిమాండ్ చేసింది. ఈ మేరకు సోమవారం జిల్లా కలెక్టర్ చిత్రా మిశ్రాకు PDSU నాయకులు వినతిపత్రం సమర్పించారు.
జమ్మికుంటలో బీసీ హాస్టల్‌కు సొంత భవనం అందుబాటులో ఉన్నప్పటికీ, విద్యార్థులను అద్దె భవనంలో ఉంచి హాస్టల్ నిర్వహిస్తున్నారని PDSU జిల్లా ప్రధాన కార్యదర్శి రాణా ప్రతాప్ ఆరోపించారు. అద్దె భవనం పరిస్థితి, విద్యార్థులకు అందుతున్న వసతులపై విద్యార్థులు, తల్లిదండ్రుల్లో ఆందోళన వ్యక్తమవుతోందని తెలిపారు.
విద్యార్థుల భద్రతకు సంబంధించిన ప్రమాణాలను పరిశీలించకుండా హాస్టల్ కొనసాగించడం సరికాదని పేర్కొన్నారు. సంబంధిత అధికారులు వెంటనే భవనాన్ని తనిఖీ చేసి, ప్రమాదకరంగా ఉన్నట్లయితే ఖాళీ చేయించి, అందుబాటులో ఉన్న సొంత భవనంలోనే హాస్టల్ నిర్వహించాలని డిమాండ్ చేశారు.
అలాగే జిల్లా వ్యాప్తంగా బీసీ, ఎస్సీ, ఎస్టీ సంక్షేమ హాస్టళ్లలో సౌకర్యాలు, భద్రతా ప్రమాణాలపై సమగ్ర విచారణ నిర్వహించాలని కోరారు. హాస్టళ్లలో వార్డెన్లు సమయపాలన పాటించడం లేదని, విద్యార్థులకు నాణ్యమైన భోజనం అందడం లేదని ఆరోపిస్తూ, బాధ్యులపై విచారణ జరిపి చర్యలు తీసుకోవాలని డిమాండ్ చేశారు.
జమ్మికుంట బీసీ హాస్టల్ వార్డెన్ నరేష్‌పై వచ్చిన ఆరోపణలపై విచారణ జరిపి, తప్పిదాలు నిర్ధారణ అయితే నిబంధనల ప్రకారం చర్యలు తీసుకోవాలని PDSU కోరింది. విద్యార్థుల భద్రత, మౌలిక సదుపాయాల విషయంలో అధికారులు నిర్లక్ష్యం చేయకూడదని స్పష్టం చేసింది. సమస్యలను పరిష్కరించకపోతే పెద్ద ఎత్తున ఉద్యమం చేపడతామని హెచ్చరించింది.
ఈ కార్యక్రమంలో PDSU జిల్లా అధ్యక్షుడు లోకిని రమేష్, జిల్లా నాయకులు పోడిశెట్టి అశోక్, కాల్వ వెంకటేష్ తదితరులు పాల్గొన్నారు.
About the Author
Today's Best Deals
Affiliate Disclosure: Some links on this page are affiliate links. Zindagi9News may earn a commission from qualifying purchases.
