రాష్ట్ర కేబినెట్ కీలక నిర్ణయాలు.. రేషన్ స్మార్ట్ కార్డుల నుంచి స్కిల్స్ యూనివర్సిటీ వరకు
స్వాతంత్ర్య దినోత్సవం సందర్భంగా రేషన్ లబ్ధిదారులకు స్మార్ట్ కార్డులు..
తెలంగాణ రైజింగ్ గ్లోబల్ సమ్మిట్ 2.0కి ఆమోదం..
రైతులు, విద్య, పరిశ్రమలు, సాగునీటిపై పలు కీలక తీర్మానాలు
హైదరాబాద్, ఆగస్టు 14 (Zindagi9News): తెలంగాణ రాష్ట్ర మంత్రివర్గం పలు కీలక నిర్ణయాలకు ఆమోదం తెలిపింది. స్వాతంత్ర్య దినోత్సవం సందర్భంగా రాష్ట్రంలోని రేషన్ కార్డు లబ్ధిదారులకు స్మార్ట్ కార్డుల పంపిణీ కార్యక్రమాన్ని ఘనంగా నిర్వహించాలని కేబినెట్ నిర్ణయించింది. ఇందుకు అన్ని జిల్లాల్లో అవసరమైన ఏర్పాట్లు చేయాలని అధికారులను ఆదేశించింది.
ప్రస్తుతం రాష్ట్రంలో 3.42 కోట్ల మంది రేషన్ లబ్ధిదారులు ఉన్నారని ప్రభుత్వం తెలిపింది. ప్రజా ప్రభుత్వం అధికారంలోకి వచ్చిన తర్వాత కొత్త రేషన్ కార్డులు జారీ చేయడంతో పాటు కొత్తగా కుటుంబ సభ్యుల పేర్లను నమోదు చేసి 62 లక్షల మందికి అదనంగా ప్రయోజనం కల్పించినట్లు పేర్కొంది.
తెలంగాణ రైజింగ్ గ్లోబల్ సమ్మిట్ 2.0
గత ఏడాది మాదిరిగానే ఈ ఏడాది కూడా తెలంగాణ రైజింగ్ గ్లోబల్ సమ్మిట్ 2.0 నిర్వహించాలని కేబినెట్ నిర్ణయించింది. డిసెంబర్ 7, 8, 9 తేదీల్లో సదస్సు నిర్వహించేందుకు ప్రాథమికంగా నిర్ణయించింది. డిప్యూటీ సీఎం భట్టి విక్రమార్కతో పాటు మంత్రులు శ్రీధర్బాబు, ఉత్తమ్ కుమార్ రెడ్డి, వివేక్ వెంకటస్వామి ఆధ్వర్యంలో సబ్కమిటీతో పాటు ప్రత్యేక కమిటీలను ఏర్పాటు చేయనున్నారు. ‘ఇన్వెస్ట్ తెలంగాణ’ థీమ్తో సదస్సు నిర్వహించడంతో పాటు ఫ్యూచర్ సిటీ ప్లాన్ను ఆవిష్కరించనున్నారు.
సన్న ధాన్యానికి రూ.500 బోనస్
వానాకాలం పంటలో ఏడు రకాల సన్న ధాన్యం సాగును ప్రోత్సహించాలని కేబినెట్ నిర్ణయించింది. గ్రామపంచాయతీ భవనాలు, రైతు వేదికల ద్వారా రైతులకు విస్తృత అవగాహన కల్పించనున్నారు. ఈ ఏడాది నుంచి ఆ ఏడు రకాల సన్నాలకు మాత్రమే క్వింటాల్కు రూ.500 బోనస్ చెల్లించాలని తీర్మానించింది.
17.54 లక్షల టన్నుల ధాన్యానికి ఈ-వేలం
యాసంగి ధాన్యం సేకరణలో రాష్ట్రం దేశంలోనే ముందంజలో నిలిచిందని ప్రభుత్వం తెలిపింది. ఈసారి 81.16 లక్షల మెట్రిక్ టన్నుల ధాన్యాన్ని కనీస మద్దతు ధరకు కొనుగోలు చేసినట్లు పేర్కొంది. ఇందులో కేంద్ర ప్రభుత్వం సేకరించే 63.62 లక్షల మెట్రిక్ టన్నులు మినహా మిగిలిన 17.54 లక్షల మెట్రిక్ టన్నుల ధాన్యాన్ని ఈ-ఆక్షన్ ద్వారా విక్రయించేందుకు కేబినెట్ ఆమోదం తెలిపింది. క్వింటాల్కు రూ.2,389 బేసిక్ ప్రైస్గా నిర్ణయించింది.
యంగ్ ఇండియా స్కిల్స్ యూనివర్సిటీ పరిధిలో ఐటీఐలు, పాలిటెక్నిక్లు
రాష్ట్రంలోని ఐటీఐలు, ఏటీసీలు, పాలిటెక్నిక్ కాలేజీలను యంగ్ ఇండియా స్కిల్స్ యూనివర్సిటీ (YISU) పరిధిలోకి తీసుకురావడానికి కేబినెట్ ఆమోదం తెలిపింది. సంబంధిత సంస్థలను ప్రస్తుత వ్యవస్థ నుంచి YISU పరిధిలోకి తీసుకురావడానికి అవసరమైన చర్యలు చేపట్టనున్నారు.
మరో 7 యంగ్ ఇండియా రెసిడెన్షియల్ స్కూళ్లకు ఆమోదం
ఆదిలాబాద్, నిర్మల్, ముధోల్, బోథ్, సిర్పూర్, గజ్వేల్, దుబ్బాక నియోజకవర్గాల్లో యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల నిర్మాణానికి కేబినెట్ ఆమోదం తెలిపింది. తొలి దశలో 113 నియోజకవర్గాల్లో స్కూల్ కాంప్లెక్స్లు ఏర్పాటు చేయాలని ప్రభుత్వం నిర్ణయించగా, తాజా ఏడు స్కూళ్లతో కలిపి ఇప్పటివరకు 86 స్కూల్ కాంప్లెక్స్లకు అనుమతులు లభించాయి.
పెట్రోల్, డీజిల్ ఆటోలకు గుడ్బై.. EVలకు రూ.1.50 లక్షల వరకు సబ్సిడీ
హైదరాబాద్ కోర్ అర్బన్ రీజియన్లో కాలుష్యాన్ని తగ్గించేందుకు తెలంగాణ ఆటో రిక్షా ఎలక్ట్రిక్ కన్వర్షన్ స్కీమ్కు కేబినెట్ ఆమోదం తెలిపింది. రూ.200 కోట్లతో అమలు చేయనున్న ఈ పథకం కింద అర్హులైన ఆటో డ్రైవర్లకు ఒక్కో వాహనానికి గరిష్ఠంగా రూ.1.50 లక్షల సబ్సిడీ అందించనున్నారు. పాత ఆటోకు ఎలక్ట్రిక్ కిట్ అమర్చుకోవడం లేదా పాత వాహనాన్ని స్క్రాప్ చేసి కొత్త ఎలక్ట్రిక్ ఆటో కొనుగోలు చేసుకునే అవకాశం కల్పించనున్నారు.
HILT దరఖాస్తుల గడువు పొడిగింపు
హైదరాబాద్ నగర పరిధిలోని కాలుష్యకారక పరిశ్రమలను నగర శివార్లకు తరలించేందుకు ఉద్దేశించిన HILT పాలసీ దరఖాస్తుల గడువును మరో మూడు నెలలు పొడిగించాలని కేబినెట్ నిర్ణయించింది. దీంతో అక్టోబర్ 31 వరకు దరఖాస్తు చేసుకునే అవకాశం కల్పించారు.
మక్తల్–నారాయణపేట–కొడంగల్ ఎత్తిపోతల పథకానికి రూ.2,100 కోట్లు
మక్తల్–నారాయణపేట–కొడంగల్ ఎత్తిపోతల పథకం ఫేజ్-2 పనులకు రూ.2,100 కోట్ల అంచనా వ్యయానికి కేబినెట్ ఆమోదం తెలిపింది. ఈ పథకం ద్వారా దాదాపు లక్ష ఎకరాలకు సాగునీరు, ఆయా ప్రాంతాలకు తాగునీరు, పారిశ్రామిక అవసరాలకు నీరు అందించేలా చర్యలు చేపట్టనున్నారు.
గూడెం దొడ్డి ప్రాజెక్టు సామర్థ్యం పెంపు
గూడెం దొడ్డి పంప్డ్ స్టోరేజీ ప్రాజెక్టు సామర్థ్యాన్ని 1.19 టీఎంసీ నుంచి 15 టీఎంసీలకు పెంచేందుకు కేబినెట్ ఆమోదం తెలిపింది. సోలార్ విద్యుత్ ఉత్పత్తి అవకాశాలపై అధ్యయనం చేసేందుకు కన్సల్టెంట్ను నియమించేందుకు కూడా నిర్ణయం తీసుకుంది.
మొత్తంగా రేషన్ స్మార్ట్ కార్డులు, రైతులకు సన్న ధాన్యం బోనస్, నైపుణ్య విద్య, రెసిడెన్షియల్ స్కూళ్లు, ఎలక్ట్రిక్ ఆటోలు, పరిశ్రమలు, సాగునీరు, విద్యుత్ రంగాలకు సంబంధించి కేబినెట్ పలు కీలక నిర్ణయాలు తీసుకుంది.
About the Author
