అక్బరుద్దీన్కు హైడ్రా మినహాయింపు ఇచ్చిందా?
రేవంత్ రెడ్డి ప్రభుత్వం సమాధానం చెప్పాలి – కేంద్ర మంత్రి బండి సంజయ్
జగిత్యాల:అక్రమ నిర్మాణాల పేరుతో పేదల గుడిసెలు కూల్చేస్తూ… మూసీ పరివాహక ప్రాంతాల్లో భవనాలు నిర్మించిన అక్బరుద్దీన్ ఒవైసీ కుటుంబానికి మినహాయింపులివ్వడం ఏంటని కేంద్ర హోంశాఖ సహాయ మంత్రి బండి సంజయ్ కుమార్ ప్రశ్నించారు.
అక్బరుద్దీన్ కాలేజీలో విద్యార్థులున్నారని, కూల్చలేమని చెప్పిన అధికారులపై మండిపడ్డ ఆయన… అదే హక్కు పేదలకు ఎందుకు లేకపోవాలి? వాళ్లు మనుషులే కదా? అని నిలదీశారు. ‘‘ఒవైసీ కుటుంబానికే విలువ ఉందా? పేదల ప్రాణాలకు విలువ లేదా? ఎంఐఎం నాయకులు పోలీసులపై దాడి చేసినా చర్యలు ఏమీ ఉండవు. ప్రభుత్వ భూములు కబ్జా చేసినా వత్తాసు పలుకుతారు. ఇదేం రాజ్యం?’’ అంటూ బండిగా నిలదీశారు.
మీడియాపై దాడులు చేస్తే బీఆర్ఎస్ను బొక్కలో వేస్తాం
ఏబీఎన్, ఆంధ్రజ్యోతి సంస్థలపై దాడులకు బీఆర్ఎస్ నేతలు సిద్ధమవుతున్నారన్న వార్తలపై బండి సంజయ్ తీవ్రంగా స్పందించారు. ‘‘మీకు దమ్ముంటే దాడి చేసి చూపండి. రెండు గంటల్లో టీ న్యూస్ ఛానల్ సంగతి మా బీజేవైఎం కార్యకర్తలు చూస్తారు. తెలంగాణ బీఆర్ఎస్ జాగీర్ కాదు. ప్రజాస్వామ్యం, మీడియా స్వేచ్ఛకు గౌరవం లేకుంటే రోడ్ల మీద తిరగనీయం’’ అంటూ హెచ్చరించారు.
రేవంత్ రెడ్డి పౌరుషం చచ్చిపోయిందా?
కాంగ్రెస్ ప్రభుత్వాన్ని తీవ్రంగా విమర్శించిన బండి సంజయ్… ‘‘రేవంత్ రెడ్డి… నిన్ను అకారణంగా జైల్లో వేసి బెయిల్ కూడా రాకుండా చేశారు. ఇప్పుడు అదే బీఆర్ఎస్తో కుమ్మక్కయ్యావా? కేసీఆర్ కుటుంబం వేల కోట్ల స్కాంలు చేసినా ఎందుకు అరెస్ట్ చేయట్లేదు?’’ అంటూ నిలదీశారు.
మహా టీవీపై దాడి చేసినప్పుడు ఖఠిన చర్యలు తీసుకుని ఉంటే ఈ పరిస్థితి వచ్చేది కాదన్నారు. ‘‘కాళేశ్వరం, ఈ ఫార్ములా, ఫోన్ ట్యాపింగ్, డ్రగ్స్, గొర్రెలు, విద్యుత్ కొనుగోళ్లు… అన్ని స్కాంలు పైనా విచారణ జరగాలి. కోర్టులు ఆదేశించినా ఎందుకు కేసీఆర్ కుటుంబంపై చర్యలు తీసుకోవడం లేదు?’’ అని ప్రశ్నించారు.
అభివృద్ధి పనులపై వివరాలు
ఈరోజు జగిత్యాల జిల్లా మేడిపల్లి, భీమారం మండలాల్లో పర్యటించిన కేంద్ర మంత్రి బండి సంజయ్ పలు అభివృద్ధి కార్యక్రమాలకు శ్రీకారం చుట్టారు.
మేడిపల్లి మండలంలో 2.47 కోట్లతో ప్రధాన రహదారి, 1.8 కోట్లతో బ్రిడ్జి నిర్మాణం ప్రారంభం.
భీమారం మండలంలో 2.29 కోట్లతో సీసీ రోడ్లు, ఎంపీ లాడ్స్ కింద 36 లక్షలతో అభివృద్ధి పనులు.
కరీంనగర్ పార్లమెంట్ పరిధిలో మొత్తం 20 వేల కోట్ల రూపాయల అభివృద్ధి పనులు పూర్తి చేసినట్టు తెలిపారు.
ఓవైసీపై ఆగ్రహం, సీఎం సమాధానం ఇవ్వాలని డిమాండ్
సల్కం చెరువులో అక్రమంగా నిర్మించిన అక్బరుద్దీన్ కాలేజీపై చర్యలు తీసుకోలేదని, అక్బరుద్దీన్కి కొమ్ములున్నాయా? సీఎం సమాధానం చెప్పాలని డిమాండ్ చేశారు. పేదల ఇళ్లను కూల్చివేస్తూ ఒవైసీ కుటుంబాన్ని వదిలేయడంపై తీవ్రంగా మండిపడ్డారు.
‘‘తెలంగాణ ఉద్యమంలో బీజేపీ పాల్గొంది. మా కుటుంబాలు లాఠీదెబ్బలు తిన్నాయి. మా ఆస్తులు చూపించండి, మీవి చూపిస్తాం. బినామీ ఆస్తులపై దేవుడి దగ్గర ప్రమాణం చేద్దాం’’ అంటూ కేసీఆర్ను బహిరంగ సవాల్ విసిరారు.
మాజీ మద్దతుదారులను కూడా నిందించారు
‘‘ఏబీఎన్, ఆంధ్రజ్యోతి పత్రికలు గతంలో కేసీఆర్కు మద్దతిచ్చాయి. ఇప్పుడు తప్పులు ఎత్తిచూపితేనే దాడులు చేస్తారా? ఇది పతనమైన పాలనకు నిదర్శనం’’ అన్నారు.
బీజేపీ ప్రజాస్వామ్య రక్షణకు సిద్ధం
‘‘బీజేపీ మీడియా స్వేచ్ఛ, ప్రజాస్వామ్య పరిరక్షణ కోసం తడబడదు. లక్షలాది కార్యకర్తలు మద్దతుగా ఉంటారు. తెలంగాణ ప్రజలు కూడా ఇటువంటి అణచివేతలకు తలవంచరు’’ అని బండి సంజయ్ స్పష్టం చేశారు.
About the Author
