తెలంగాణలో ఆటోలకు ఎలక్ట్రిక్ మార్పిడి పథకం
హైదరాబాద్, ఆగస్టు 27 (జిందగీ9న్యూస్): తెలంగాణ ప్రభుత్వం కీలక నిర్ణయం తీసుకుంది. కోర్ అర్బన్ రీజియన్ ఎకానమీ (CURE) పరిధిలో నడుస్తున్న పెట్రోల్, డీజిల్ ఆటోరిక్షాలను ఎలక్ట్రిక్ వాహనాలుగా మార్చేందుకు “తెలంగాణ ఆటోరిక్షా ఎలక్ట్రిక్ కన్వర్షన్ స్కీమ్–2026”ను ప్రభుత్వం ప్రకటించింది.
ఈ పథకం కింద CURE పరిధిలోని 18,766 అర్హత కలిగిన ఆటోరిక్షాలకు ఆర్థిక సహాయం అందించనున్నారు. ఇందుకోసం ప్రభుత్వం మొత్తం రూ.200 కోట్ల బడ్జెట్ కేటాయించింది.
రెండు విధానాల్లో ప్రయోజనం
అర్హులైన ఆటో యజమానులకు రెండు ఆప్షన్లు కల్పించారు.
కాంపోనెంట్–A: ప్రస్తుతం ఉన్న ఆటో చాసిస్ను కొనసాగిస్తూ, AIS-123 ఆమోదం పొందిన ఎలక్ట్రిక్ కిట్ను అమర్చుకోవచ్చు. ఇందుకు ప్రభుత్వం రూ.1.50 లక్షల వరకు లేదా కిట్ వాస్తవ ఖర్చు, ఇందులో తక్కువ మొత్తాన్ని ఆర్థిక సహాయంగా అందిస్తుంది. ఫిక్స్డ్ బ్యాటరీ లేదా స్వాపబుల్ బ్యాటరీ కిట్ను ఎంపిక చేసుకునే అవకాశం ఉంటుంది.
కాంపోనెంట్–B: పాత పెట్రోల్/డీజిల్ ఆటోను పూర్తిగా అప్పగించి, కొత్త ఫ్యాక్టరీ తయారీ ఎలక్ట్రిక్ ఆటోను కొనుగోలు చేసుకోవచ్చు. ఈ విధానంలో కూడా ప్రభుత్వం రూ.1.50 లక్షల ఫ్లాట్ సబ్సిడీ అందిస్తుంది. మిగిలిన మొత్తాన్ని లబ్ధిదారుడు చెల్లించాలి.
నాలుగు వర్గాలకు రూ.50 కోట్ల చొప్పున
పథకం కోసం కేటాయించిన రూ.200 కోట్లను నాలుగు సంక్షేమ శాఖలకు విభజించారు. ఎస్సీ అభివృద్ధి శాఖ, ఎస్టీ అభివృద్ధి శాఖ, బీసీ సంక్షేమ శాఖ, మైనారిటీస్ సంక్షేమ శాఖలకు రూ.50 కోట్ల చొప్పున కేటాయించారు.
అర్హత కలిగిన ఆటో యజమానులకు వారి సామాజిక వర్గంతో సంబంధం లేకుండా CURE పరిధిలో ఈ పథకం అమలు కానుంది.
ధరల వివరాలు ఆన్లైన్లో
ఎలక్ట్రిక్ కిట్లు, కొత్త ఎలక్ట్రిక్ ఆటోల తయారీదారులు, డీలర్లను రవాణా శాఖ సాంకేతికంగా పరిశీలించి ఎంపిక చేయనుంది. కిట్ల ధరలు, బ్యాటరీ సామర్థ్యం, రేంజ్, వారంటీ తదితర వివరాలను సాఫ్ట్వేర్ మాడ్యూల్లో అందుబాటులో ఉంచనున్నారు.
కొత్త ఎలక్ట్రిక్ ఆటో ధరపై ఎలాంటి గరిష్ఠ పరిమితి విధించలేదు. అయితే ప్రభుత్వం అందించే సబ్సిడీ రూ.1.50 లక్షలకే పరిమితం. అంతకంటే ఎక్కువ ధర ఉన్న వాహనాన్ని లబ్ధిదారుడు ఎంపిక చేసుకుంటే అదనపు మొత్తాన్ని అతడే భరించాలి.
ఈ పథకాన్ని రవాణా కమిషనర్ ఆధ్వర్యంలో అమలు చేయనున్నారు. పథకం అమలుకు రాష్ట్ర, శాఖ, జిల్లా స్థాయిల్లో మూడు దశల పర్యవేక్షణ వ్యవస్థను ఏర్పాటు చేయనున్నట్లు ప్రభుత్వ ఉత్తర్వుల్లో పేర్కొన్నారు.
About the Author
Today's Best Deals
Affiliate Disclosure: Some links on this page are affiliate links. Zindagi9News may earn a commission from qualifying purchases.
