ఐఫోన్ పిచ్చి: కొండపై నుంచి దూకి ఒకే కుటుంబంలో ముగ్గురు ఆత్మహత్య
ముంబై:ఈఎంఐ (EMI) కట్టేందుకు తండ్రి నిరాకరించాడనే కోపంతో ఒక యువకుడు కొండపై నుంచి దూకగా, అతడిని రక్షించబోయిన తండ్రితో పాటు, కళ్లెదుటే భర్త, కొడుకు చనిపోవడాన్ని తట్టుకోలేక తల్లి కూడా లోయలోకి దూకిన హృదయవిదారక ఘటన మహారాష్ట్రలో చోటుచేసుకుంది. ఈ విషాదకర ఘటనలో ఒకే కుటుంబానికి చెందిన ముగ్గురు అక్కడికక్కడే మరణించారు.
అసలేం జరిగిందంటే:
పోలీసుల కథనం ప్రకారం.. ఒక యువకుడు ఇటీవల ఐఫోన్ కొనుగోలు చేశాడు. అయితే దానికి సంబంధించిన నెలవారీ ఈఎంఐ (EMI) చెల్లించే విషయంలో గత కొన్ని రోజులుగా ఇంట్లో తల్లిదండ్రులతో గొడవ జరుగుతోంది. తండ్రి డబ్బులు ఇవ్వనని చెప్పడంతో తీవ్ర ఆవేశానికి లోనైన ఆ యువకుడు, సమీపంలోని ఒక కొండపైకి వెళ్లి అక్కడి నుంచి దూకి ఆత్మహత్య చేసుకుంటానని బెదిరించాడు.
కాపాడబోయి తండ్రి.. తట్టుకోలేక తల్లి..
విషయం తెలుసుకున్న తండ్రి ఆందోళనతో కొండపైకి చేరుకుని, ఆత్మహత్యకు యత్నిస్తున్న కొడుకును వెనక్కి లాగి కాపాడటానికి ప్రయత్నించాడు. ఈ క్రమంలో ఇద్దరూ బ్యాలెన్స్ తప్పి కొండపై నుంచి కిందకు పడిపోయారు. లోయలో పడిన తండ్రీకొడుకులు ఇద్దరూ అక్కడికక్కడే ప్రాణాలు కోల్పోయారు. కళ్లెదుటే భర్త, కుమారుడు మృత్యువాత పడటాన్ని చూసి తీవ్ర దిగ్భ్రాంతికి గురైన తల్లి, ఆ తట్టుకోలేని బాధతో కొద్దిసేపటికే అదే కొండపై నుంచి లోయలోకి దూకి తనువు చాలించింది.
ఒక చిన్న మొబైల్ ఫోన్ వివాదం కారణంగా కంటికి రెప్పలా చూసుకున్న కొడుకుతో పాటు తల్లిదండ్రులు కూడా ప్రాణాలు కోల్పోవడంతో ఆ ప్రాంతంలో తీవ్ర విషాద ఛాయలు అలుముకున్నాయి. ఈ ఘటనపై స్థానిక పోలీసులు కేసు నమోదు చేసి దర్యాప్తు చేస్తున్నారు.
About the Author
