అమ్మాయిలూ.. ‘రెంట్ బాయ్ఫ్రెండ్’ ఆఫర్ల వలలో పడొద్దు!
సోషల్ మీడియాలో కలర్ఫుల్ ఆఫర్లతో సైబర్ మోసాలు.. ముందుగా డబ్బులు వసూలు చేసి బ్లాక్మెయిల్ చేసే అవకాశం ఉందని హెచ్చరిక
హైదరాబాద్, ఆగస్టు 8 (Zindagi9news): సోషల్ మీడియాలో వైరల్ అవుతున్న ‘రెంట్ బాయ్ఫ్రెండ్’ ఆఫర్ల పట్ల యువతులు, అమ్మాయిలు అప్రమత్తంగా ఉండాలని అధికారులు హెచ్చరిస్తున్నారు. ఒంటరితనాన్ని ఆసరాగా చేసుకుని కాఫీ, సినిమా, షాపింగ్, ఈవెంట్లకు తోడుగా ఉంటామంటూ సోషల్ మీడియా వేదికల్లో ఆకర్షణీయమైన పోస్టర్లు పెడుతూ సైబర్ మోసాలకు పాల్పడే అవకాశం ఉందని సూచిస్తున్నారు.
ఇన్స్టాగ్రామ్, టెలిగ్రామ్, ఫేస్బుక్ వంటి వేదికల్లో ‘50% OFF’, ‘Rent Boyfriend’, ‘Personal Companion’ వంటి పేర్లతో పోస్టర్లు ప్రచారం చేస్తున్నట్లు సమాచారం. గంటపాటు కాఫీ మీటింగ్, సినిమా డేట్, షాపింగ్, ఈవెంట్లు, ఫుల్ డే ప్యాకేజీలంటూ వివిధ ధరలను పేర్కొంటూ యువతులను ఆకర్షించే ప్రయత్నం చేస్తున్నారు.
ఈ ప్రకటనలకు స్పందించిన వారితో కేటుగాళ్లు చాటింగ్ ప్రారంభించి, బుకింగ్ కన్ఫర్మేషన్, సెక్యూరిటీ డిపాజిట్, అడ్వాన్స్ చెల్లింపు పేరుతో డబ్బులు వసూలు చేసే అవకాశం ఉంది. క్యూఆర్ కోడ్లు, డిజిటల్ వాలెట్లు లేదా ఇతర ఆన్లైన్ చెల్లింపు మార్గాల ద్వారా డబ్బులు తీసుకున్న అనంతరం అకౌంట్లను బ్లాక్ చేసే ప్రమాదం ఉందని హెచ్చరిస్తున్నారు.
అంతేకాకుండా చాటింగ్ సమయంలో సేకరించిన ఫోన్ నంబర్లు, వ్యక్తిగత వివరాలు, ఫొటోలు తదితరాలను దుర్వినియోగం చేసి తర్వాత బెదిరింపులు, బ్లాక్మెయిల్కు పాల్పడే అవకాశం కూడా ఉందని అధికారులు సూచిస్తున్నారు. ఇటీవల ‘రెంట్ ఎ బాయ్ఫ్రెండ్’ తరహా కాన్సెప్ట్లపై సోషల్ మీడియాలో ప్రచారం జరుగుతున్న విషయం కూడా పలు కథనాల్లో నమోదైంది.
అమ్మాయిలు ఇలాంటి ఆకర్షణీయమైన ఆఫర్లను చూసి అపరిచిత వ్యక్తులతో చాటింగ్ చేయడం, వ్యక్తిగత వివరాలు లేదా ఫొటోలు పంపడం, నేరుగా కలవడం చేయవద్దని సూచిస్తున్నారు. అపరిచితులకు ముందస్తుగా డబ్బులు చెల్లించకూడదని హెచ్చరిస్తున్నారు.
ఇలాంటి అనుమానాస్పద పోస్టులు లేదా సైబర్ మోసాలు ఎదురైతే వెంటనే సైబర్ క్రైమ్ హెల్ప్లైన్ 1930కు ఫిర్యాదు చేయాలని, లేదా జాతీయ సైబర్ క్రైమ్ రిపోర్టింగ్ పోర్టల్ ద్వారా ఫిర్యాదు చేయాలని సూచిస్తున్నారు.
About the Author
