రాష్ట్ర క్యాబినెట్ కీలక నిర్ణయాలు: రెండో విడత ఇందిరమ్మ ఇళ్లు, గోదావరి పుష్కరాలకు ₹1000 కోట్లు
హైదరాబాద్, మే 23: రాష్ట్ర మంత్రివర్గ సమావేశంలో ప్రజా సంక్షేమం, గృహనిర్మాణం, విద్య, విద్యుత్, నీటిపారుదల, పరిశ్రమల అభివృద్ధికి సంబంధించిన పలు కీలక నిర్ణయాలకు రాష్ట్ర క్యాబినెట్ ఆమోదం తెలిపింది. ముఖ్యంగా రెండో విడత ఇందిరమ్మ ఇళ్ల మంజూరు, గోదావరి పుష్కరాల ఏర్పాట్లు, జూనియర్ కళాశాలల్లో భోజన పథకం అమలు వంటి నిర్ణయాలు ప్రాధాన్యత సంతరించుకున్నాయి.
రెండో విడత ఇందిరమ్మ ఇళ్లకు గ్రీన్ సిగ్నల్
రాష్ట్రవ్యాప్తంగా రెండో విడతలో 2.5 లక్షల ఇందిరమ్మ ఇళ్ల మంజూరుకు క్యాబినెట్ ఆమోదం తెలిపింది. ప్రతి నియోజకవర్గానికి 2 వేల ఇళ్ల చొప్పున కేటాయించాలని నిర్ణయించింది. అలాగే ఉమ్మడి రాష్ట్రంలో అసంపూర్తిగా నిలిచిపోయిన ఇళ్ల నిర్మాణాలను పూర్తి చేయడానికి ప్రత్యేక నిధులు మంజూరు చేయనుంది. పునాదుల దశలో ఉన్న ఇళ్లకు రూ.3 లక్షలు, గోడలు పూర్తై శ్లాబు దశలో ఆగిపోయిన ఇళ్లకు రూ.2 లక్షలు ఆర్థిక సహాయం అందించనున్నారు.
అసంపూర్తి ఇళ్ల పూర్తి కోసం ప్రతి నియోజకవర్గానికి 500 ఇళ్ల చొప్పున నిధులు కేటాయించనున్నారు. తొలి విడతలో నిర్మించిన ఇళ్లలో జూన్ 2 నాటికి లక్ష ఇళ్ల గృహప్రవేశాలు నిర్వహించనుండగా, జూన్ 1న కొమురం భీం అసిఫాబాద్ జిల్లా కెరమెరి మండలం కొఠారి గ్రామంలో 28 ఇళ్లను సీఎం, డిప్యూటీ సీఎం, మంత్రులు ప్రారంభించనున్నారు.
అలాగే హైదరాబాద్ క్యూర్ పరిధిలోని 24 నియోజకవర్గాల్లో LIG వర్గాలకు లక్ష ఇళ్లు నిర్మించేందుకు నిర్ణయం తీసుకున్నారు. రాష్ట్రంలోని 15 వేల గుడిసెల కుటుంబాలకు వెంటనే ఇందిరమ్మ ఇళ్ల పత్రాలు ఇవ్వాలని క్యాబినెట్ తీర్మానించింది.
గోదావరి పుష్కరాలకు ₹1000 కోట్ల నిధులు
2026 జూన్ 26 నుంచి జులై 7 వరకు జరగనున్న Godavari Pushkaralu 2026 ఏర్పాట్ల కోసం రూ.1000 కోట్ల నిధులకు క్యాబినెట్ ఆమోదం తెలిపింది. తొలి విడతగా రూ.300 కోట్లు విడుదల చేయాలని నిర్ణయించింది.
విద్యుత్, విద్య రంగాల్లో కీలక నిర్ణయాలు
విద్యుత్ పంపిణీ వ్యవస్థ బలోపేతం కోసం RDSS పథకంలో చేరేందుకు తెలంగాణ డిస్కంల ప్రతిపాదనలకు ఆమోదం లభించింది. అలాగే రాష్ట్రంలోని అన్ని ప్రభుత్వ జూనియర్ కళాశాలల్లో మధ్యాహ్న భోజన పథకాన్ని అమలు చేయాలని నిర్ణయించారు. విద్యార్థులకు ఉదయం అల్పాహారం, పాలు అందించే ప్రతిపాదనకూ ఆమోదం లభించింది.
విలీనాలు, నీటిపారుదల ప్రాజెక్టులకు నిధులు
DCMSలను మార్క్ఫెడ్లో, TGRICని హాకాలో విలీనం చేయాలని రాష్ట్ర క్యాబినెట్ నిర్ణయించింది. ఇక Palamuru-Rangareddy Lift Irrigation Scheme భూసేకరణ, పునరావాసం, మౌలిక వసతుల కోసం రూ.587 కోట్లు కేటాయించేందుకు ఆమోదం తెలిపింది.
లైఫ్ సైన్సెస్ పాలసీ 2026-30కు ఆమోదం
2030 నాటికి తెలంగాణను ప్రపంచ టాప్-5 లైఫ్ సైన్సెస్ హబ్లలో ఒకటిగా నిలపాలనే లక్ష్యంతో రాష్ట్ర ప్రభుత్వం నెక్స్ట్ జనరేషన్ లైఫ్ సైన్సెస్ పాలసీ 2026-30కి ఆమోదం తెలిపింది. ఈ పాలసీని దావోస్లో ఆవిష్కరించనున్నారు.
ఈ పాలసీ ద్వారా 5 ఏళ్లలో 5 లక్షల ఉద్యోగాలు, 25 బిలియన్ డాలర్ల పెట్టుబడులు ఆకర్షించాలని ప్రభుత్వం లక్ష్యంగా పెట్టుకుంది. లైఫ్ సైన్సెస్, ఫార్మా, బయోటెక్, మెడికల్ ఇన్నోవేషన్ రంగాల్లో తెలంగాణను పెట్టుబడుల కేంద్రంగా తీర్చిదిద్దడంతో పాటు యువతకు R&D, తయారీ, డిజిటల్ హెల్త్ రంగాల్లో ఉపాధి అవకాశాలు కల్పించడంపై దృష్టి సారించనుంది.
About the Author
