వానాకాలం సీజన్‌పై కలెక్టర్లతో సీఎం సమీక్ష

వానాకాలం సీజన్‌పై కలెక్టర్లతో సీఎం సమీక్ష

రుతుపవనాల ముందస్తు ప్రవేశంతో తక్షణ చర్యలు తీసుకోండి: సీఎం రేవంత్ రెడ్డి

హైదరాబాద్: రాష్ట్రంలో రుతుపవనాలు 15 రోజుల ముందుగానే ప్రవేశించడంతో, వానాకాలం పంటల సాగు, ధాన్యం సేకరణ, ఇతర కీలక అంశాలపై ముఖ్యమంత్రి రేవంత్ రెడ్డి జిల్లా కలెక్టర్లతో వీడియో కాన్ఫరెన్స్‌ నిర్వహించారు.

• విత్తనాలు, ఎరువులు అందుబాటులో ఉండేలా చర్యలు
• మిగిలిపోయిన ప్రాంతాల్లో ధాన్యం సేకరణ తక్షణంగా పూర్తిచేయాలి
• ఇందిరమ్మ ఇండ్లు, భూ భారతి, ఇసుక అక్రమ రవాణా నియంత్రణపై ప్రత్యేక దృష్టి
• జూన్ 2 న తెలంగాణ ఆవిర్భావ దినోత్సవం కోసం ఏర్పాట్లు పూర్తి చేయాలి

కమాండ్ కంట్రోల్ కేంద్రం నుంచి ఉప ముఖ్యమంత్రి మల్లు భట్టి విక్రమార్క, ఇతర మంత్రులతో కలిసి సీఎం సూచనలు చేశారు. 29, 30 తేదీల్లో ఇంచార్జ్ మంత్రులు జిల్లా సమీక్షలు జరిపి, జూన్ 1 నాటికి నివేదికలు సమర్పించాలని సీఎం ఆదేశించారు.

ధాన్యం కొనుగోలు విజయవంతం:

ఇప్పటివరకు 64.5 లక్షల మెట్రిక్ టన్నులు ధాన్యం సేకరించి, 48 గంటల్లోనే రైతులకు రూ.12,184 కోట్లు చెల్లించామని సీఎం వెల్లడించారు. 90% సేకరణ పూర్తయిందని, మిగిలిన ధాన్యాన్ని త్వరితగతిన సేకరించాలని సూచించారు.

వర్షపాతం & అప్రమత్తత:

రాష్ట్రవ్యాప్తంగా ఇప్పటికే 29% అధిక వర్షపాతం నమోదైందని, వ్యవసాయ శాఖ అధికారులు మరింత అప్రమత్తంగా ఉండాలని సీఎం స్పష్టం చేశారు.

ఈ వీడియో కాన్ఫరెన్స్‌లో మంత్రులు ఉత్తమ్ కుమార్ రెడ్డి, తుమ్మల నాగేశ్వరరావు, పొంగులేటి శ్రీనివాస రెడ్డి, పొన్నం ప్రభాకర్, సీఎం సలహాదారు వేమ నరేందర్ రెడ్డి, ప్రభుత్వ ప్రధాన కార్యదర్శి రామకృష్ణారావుతో పాటు పలు శాఖల ఉన్నతాధికారులు పాల్గొన్నారు.